×

منوی بالا

منوی اصلی

دسترسی سریع

اخبار سایت

true

ویژه‌های خبری

true
   دوشنبه ۵ فروردین ۱۳۹۸  
it is true
true
true
آذربایجان-دا بایرام سوفره سی: هفت سین یوخسا یئددی سین؟! / علی فرهاد

«هفت سین» دئدیییمیز بایرام سوفره سی بیر تاپماجا کیمی اولوب. آخی نئجه اولا بیلر یئددی دنه «س» حرفیله باشلایانلار سوفره­یه قویولا. سوال لار بونلاردیر نَدن «س» ایله باشلایانلار و نَدن سوفره ده «س» ایله باشلامایانلاری دا قویوروق؟ نییه بو سوال لارین چوخونا عاغلیمیزا باتان آنلام یوخدور!! دوزدور هره­سینه بیر جور دلیل دوزلدیبلر، آما گؤرک بونلارین دوزو نه اولا بیلر. بو سوفره یه نه لر دوزمه لی ییک. هره سینین آنلامی نَدیر؟ میثال اوچون سیرکه نه اوچون لازیم دیر؟ تکجه «س» ایله باشلاندیغینا گؤره می ؟

سیز بو تورکجه جمله نی نظره آلین: «یئددی سین سوفره یه قوی» بیلدییینیز کیمی سین تورکجه ده بیر پسوند دیر آما فارسجادا  بیر حرفین آدیر. ایندی نه راحت «یئددی سین» بیر یانلیش چئویرمه ایله «هفت سین» اولا بیلر. سونرا دا ایللر بویو نَدن «س» یا «سین» اولدوغون آختاریب هئچ دوزمللی دلیل ده تاپا بیلمیریک.

حتمن «س» حرفیله باشلاماغا بو سوفره ده اولانلارین دلیلی یوخدور. اونوتمایاق کی بیزه قدیمدن یئتیشن هر بیر رسمین تاریخی و ان آزیندان اسطوروی آنلاملاری واردیر و بو آنلاملارین اؤنمینی باشا دوشمک لازیمدیر.

اوسطوره لریمیزه گؤره بو سوفره یه یئددی برکتی قویمالی ییق. دئمک اولار قدیمکیلر دئمیشلر؛ «برکتلردن یئددی سین سوفره یه قوی» ( هفت سین یوخ!) و بئله لیکله بونلاری اورتایا قویماق لا اؤزموزو اونلاردان فایدالی حیس ائدیریک. بو یئددی برکت، گؤی برکتی، سو برکتی، یئر برکتی، حئیوان برکتی، آغاج برکتی، آل – وئر برکتی، گؤیرمک برکتی دیر. ایل تحویلیندن سونرا بو برکت لر عایله آراسیندا بؤلونر. اونلاری یئمک و ساخلاماقلا بیز بو برکتلری ایلین باشیناجا اؤزوموزله داشییاریق.

دئمه ­لیییک بو یازیدا حؤرمتلی آراشدیریجی «ناصر منظوری» جنابلارینین بو قونو دا یازدیقلاریندان فایدالانمیشیق.

 

 

 

۱ – آینا ایله قرآن گؤی برکتی دیلر. «قرآن»-ا آسمانی کیتاب دئییریک و اونون گؤیدن و آللاه طرفیندن بیزه نازیل اولماسین بیر برکت کیمی ساییریق. آینادا آیدینلیق نیشانه سی و آی کلمه سیندن آلیندیغی اوچون گؤی برکتی ساییلیر.

 

۲ – سو و بالیق ایکی سی ده سو برکتی دیلر. سو اؤزو بؤیوک نعمت اولدوغونا گؤره و بالیق سودان آلینان برکت کیمی قوتلانیر. بالیق دا قیرمیزی رنگ ده مبارک اولماق نیشانه سی دیر.

 

۳ – بوغدا اسکی چاغلاردان بَری یئردن اله گلن برکت و آداملارین ان واجیب یئمک لریندن اولوب. اوندان اله گلن هر بیر شئی ده بو برکت دن اؤرنک اولا بیلر. اونلارین آن خالیص لری قووورغا و سومنی (سمنو) اولا بیلر.

 

۴ – یومورتا آن چوخ ایشله نن حیئوان برکتلریندن دیر کی سوفره نی گؤزل له ده بیلر. اونو بویاماق اولار. بویاماق اوچون تامام رنگ لردن و هر وسیله نی ایشلتمک اولار. اسکی چاغلاردا سوغان قابیغی، گیرده کان قابیغی و گؤی-گؤیرنتی لردن اله گلنلردن بویاناردی. ایندیسه شمعی میداد، سو رنگی و هر ندن کی الیزده اولسا فایدالانا بیلرسیز. بیز بو یومورتالاری بیلدیییز دیرناق لاکی له بویامیشیق!

 

۵ – «آلما» ایله «ایده» آغاج برکتی دیر. دئدیییمیزه گؤره قیرمیزی اولدوقلاری اونلارین مبارک اولدوغون دا گؤستریر. بونلارین ایکیسین یوخسا بیرین قویماق اولار.

 

۶ – سیککه آل – وئر برکتی دیر. قدیم چاغلاردان سیککه بیر آلیش-وئریش و مال-دؤولت نیشانه سی کیمی ایشله نیب. بو سیککه لرین بیرین برکت اوچون ایل بویو یانیزدا دولاندرمانیزین هئچ ضرری یوخ.

 

۷ – سبزه گؤیرتمک، گؤیرمک برکتینه گؤره اولور. گؤیرمک، نسلین آرتماسی و دوغماق نیشانه لریندن بیری دیر.

 

۸- کئچن ایل اینک ایلی ایدی. بیز بو ایلدن نیشانه اولاراق ایکی اینک سوفره یه قویموشدوق. هر ایلین نیشانه سی او ایلین سوفره سین گؤزل ائله یه بیلر.

 

۹ – بو سوفره ده بئله بیر زاد یوخ آما بیر شیرینی نین ده اولماسی سوفره یه شیرینلیق وئرر. ایللاه کی اؤز یاشادیغیز یئریزین سوقاتی اولا. تبریزین ده سوقاتلاری نین بیری «لؤووز» دور.

 

*** علی فرهاد / سردبیر

true
برچسب ها :

این مطلب بدون برچسب می باشد.

true
false
true

شما هم می توانید دیدگاه خود را ثبت کنید

√ کامل کردن گزینه های ستاره دار (*) الزامی است
√ آدرس پست الکترونیکی شما محفوظ بوده و نمایش داده نخواهد شد


false



ارسال